Usa ka retaliation ang gihimo sa grupong Bangsamoro Islamic Freedom Fighters o BIFF sa Pigcawayan, North Cotabato hinungdan nga nandagit sila’g mga sibilyan ug nang-harassed sa mga detachment sa kasundaluhan.
Sa pakighinabi sa RMN Davao sa tigpamaba sa 6th Infantry Division Philippine Army Captain Arvin Encinas sa iyang lantaw tungod kay daghan ang casualties sa grupong BIFF sa gihimong subsub nga operasyon sa kasundaluhan hinungdan nga nandagit na sila’g mga sibilyan.
Segun ni Encinas nga naglisod karon ang kasundaluhan sa padayon nilang operasyon sa Pigcawayan, North Cotabato tungod kay gihimo sa BIFF nga human shield ang lima ka mga hostages diha sa ilang pag-atras.
Giklaro sab ni Encinas nga di pa sigurado kung mga estudyante ang lima ka gidagit sa grupong BIFF sa Malagakit Elementary School ug wala pa sab naila kung kinsa kining mga gidagit nga mga sibilyan.
Usa ka CAFGU ang samaran sa padayong engkwentro sa militar tali BIFF.
Di muubos sa 40 ka mga miyembro sa BIFF ang giingong miatake sa maong lugar.
Gikumpirma ni Encinas nga nagpabilin pa gihapon sa Pigcawayan ang armadong grupo.
Una pa man nahitabo ang insidente nakaalerto na ang militar busa wala nagpamalampuson ang BIFF sa ilang plano nga himuong kagubot.
Panawagan niini sa katawhan nga magpabiling alerto ug kalmado.
(Updated)
Aimee Guinita
