Retirado nga empleyado ginlagas sang riding in tandem criminal

Maswerte nga nakalampuwas sa riding in tandem criminal ang retirado nga empleyado sang Dole Philippines matapos makapangayo bulig sa Barangay Kapitan alas 6:30 kagab-i sa Barangay Crossing Palkan, Polomolok, South Cotabato.
Tubtub karon padayon pa nga ginabulong ang biktima nga ginkilala kay Nick Bulauro Machan, 63anyos, residente sang Purok Bliss sa nasambit nga Barangay bangud sa igo sang bala sa iya wala nga abaga, tiyan kag likod matapos nga ginlagas sang wala nakilal-an nga mga suspek nga nakasakay sa wala natumod nga motorsiklo.
Sa imbestigasyon sang Polomolok MPS, samtang ginabaybay sang biktima ang dalan sang Purok 6, Barangay Crossing Palkan sa nasambit nga Banwa sakay sa iya RS 125 nga motorsiklo, nagaduag sang itom, may plaka 7035 MY sang masiplatan sini nga ginasundan sya sang motorsiklo, apang pag abot suno pa sa lugar nga gintabuan, hinali na lang ini nga gintiro sang pipila ka beses sang mga suspek.
Sa pihak sang pilas nga iya naangkon, natinguha pa sang biktima nga makapalayo sa mga suspek kag makapangayo bulig sa balay ni Kapitan Apitong sa nasambit nga barangay.
Gilayon naman nga gindala ang biktima sa ospital kag malayo na sa katalagman.
Sa karon padayon pa ang imbestigasyons sang Polomolok PNP bahin sa insidente.