General Santos City— Padayon ang ginahimong imbestigasyon sa kapulisan human ang natigayong pagpamusil sa usa ka retiradong pulis alas 10 pasado ang takna sa buntag sa Bayabas St. Corer Durian St., Brgy. North ning dakbayan.
Sumala kang Police Chief Inspector Roel Abejero, hepe sa Police Station 1 nga nahimong target sa maong pagpamusil mao ang retiradong pulis nga si SPO1 Rowen Ruiz nga kanhing nakabase sa Police Drug Enforcement Unit 12.
Sa inisyal nga imbestigasyon, gisulod sa iyahang compound ang nahisgutan ug gipabuthan makaduhang higayon apan swerteng wala maigo human nga kini makahupo.
Dugang pamahayag ni PCI Abejero nga narekober sa lugar ang duha ka empty shell sa kalibre 45 nga armas nga maoy gigamit sa pagpamusil.
Sa karon padayon pa nilang ginasuta ang motibo sa maong pagpamusil apan aduna matud pay posibilidad nga kini may kalabutan sa iyahang trabaho kaniadto.
Ilaha na usab ginasuta ang CCTV Cameras nga nahimutang sa usa ka establishemento duol sa panimalay sa nasangpit nga pulis basin ug nakuhaan ang nawong sa mga suspek nga wala nakatabon ang nawong.
