Arestado ang retired PNP Member kag upod sini nga mangunguma alas 8:30 kagab-i matapos makuhaan sang mga armas sa ginpatigayon nga mobile patrol sang T’boli PNP sa pagpanguna ni PCI Ramil Villagracia, Hepe sang T’boli MPS sa Barangay Datal Bob, T’boli, South Cotabato.
Gilayon nga gindakop si SPO4 Teodorico Babao Bastan Jr., 65anyos, may asawa retired PNP member nga anay nadestino sa traffic section sang GenSan Police Station, residente sang nasambit nga lugar matapos makuha sa iya possession ang isa ka unit sang Ingram MC11 Caliber 9mm, magazine nga kargado suno pa sang lima ka bala.
Sa dugang pa nga pagpangusisa, may standing warrant of arrest ang retired PNP sa pagbayolar sang R.A. 9262 nga may criminal case number 80150-2025 kag 80751-2015 nga ginpapanaog ni Hon Judge Lope Calio sang 11th Judicial Region sang RTC Branch 33 sa Davao.
Samtang gindakop man ang upod sini nga ginkilala kay Jony Bacaling Celiz, 36anyos, may asawa, mangunguma residente sang Barangay Simbo, Tupi, South Cotabato matapos makuha man sa iya possession ang isa ka unit sang super 38 pistol, magazine nga may karga sang apat ka bala kag spare magazine nga may sulod sang apat ka bala.
Gilayon naman nga gindala ang mga suspek kag ang mga nakumpiskar nga armas sa kustodiya sang T’boli MPS para sa disposasyon sang ila sini nga kaso.
Kaangot sini ginpahayag ni Chief Inspector Villagracia nga plano pa nga magpalag ang suspek apang ginmanduan nya ang iya sini tao tiruhon sa tion nga magbato ini sa mga otoridad
Dugang pa ni Villagracia ginapreparar na nila ang kaso batok sa mga suspek sa pagbayolar sa R.A. 10591 ukon Comprehensive Firearms and regulation law.
Photo credit: T’boli MPS
