South Cotabato—Gibulabog karon sa usa ka higala sa gipatay nga trabahante sa KCC Mall of Koronadal nga si Jennelyn Gansing, 22 anyos, nga duha ka tawo ang gipasakaan niini og kasong pagpanglugos kung asa kaniadtong Setyembre 2017 lamang gipahigayon ang hearing.
Matud pa kang “alyas Marie” nga una pa man gipatay ang biktima nakasugilon pa kini kaniya nga may gipasakaan kini og kaso og wala niini gipahibalo sa iyahang pamilya sa Tboli South Cotabato nga biktima siya sa pagpanglugos tungod sa duili niini gusto nga madamay sa kaulaw ang iyahang pamilya.
Gi dugang pa ni Alyas Marie nga gitudlong suspek sa paglugos sa biktima ang mag amahan og retired PNP Officer apan ang anak sa pulis ang nabalhog na karon sa South Cotabato Provincial Jail, samtang ang amahan ang gawasnon pa karong mga panahona.
Kahibaluan nga kaniadtong bulan sa Marso 2017 sa dihang biktima sa pagpanglugos si Jennelyn sa usa ka lodging house human kini gihubog sa mga suspek.
Samtang gikumperma usab sa mga kabanay sa gipatay nga ang usa sa mga suspek sa paglugos sa biktima ang kanhi niini nobyo nga wala na lamang gihinganlan sa kapaulisan.
Kahibaluan nga gipusil patay ang biktima kaniadtong milabayng adlaw sa riding in tandem sa atubangan mismo sa boarding house niini sa Koronadal City.
Sa pagkakaron nanawagan ang mga kabanay sa gipatay ngadto sa kanhing pulis nga mupakita kung wala kini kalambigitan sa krimen o pagpatay sa dalaga aron madepensahan niini ang kaugalingon.(Emir Bariquit)
