General Santos City—patay ang usa ka retiradong supervisor sa usa ka kumpanya nga nakabase sa Paglas State, Buluan, Maguindanao human kining gipusil alas 6:00 pasado sa gabie kagahapong adlawa sa may diversion road ning dakbayan sa Gensan.
Biktima giilang si Jay Masucat Mangilin, 53, nga taga Phase 2, Purok Maunlad, barangay Apopong, Gensan.
Sumala sa usa ka tricycle Driver nga si Alias Henry, samtang siya nagmaniho sa iyang tricycle sa may diversion road, kalit lang kini nakadungog ug buto sa pusil, paglingi niini, iyang nakit-an ang biktima nga nagbuy-od na sa gimanihuan niining tricycle.
Didto na niya nakit-an ang duha ka mga lalaki nga nakamotorsiklo kansa responsabli sa pagpamusil sa biktima nga paspas nga misibat padulong sa highway nga bahin. patay gilayon ang nasangpit human nakaangkon ug grabeng samad sa iyang lawas.
Dugang pa ni Henry nga ang driver sa motorsiklo nakahelmet samtang ang back rider kansa maoy gunman nakasul-ob ug itom nga jacket.
Sa karon ang patayng lawas sa biktima gidala na sa iyang mga kabanay sa Columbio, Datu Paglas Maguindanao. Samtang nagpadayon usab ang imbistigasyon sa kapulisan kalabutan sa insidenti.
