Davao City – Usa ka maayong lakang ang bahad ni Pres. Rodrigo Duterte nga silotan ug balasahon ang mga opisyal sa mga local government unit level nga nagbinuang sa ilang katungdanan.
Epektibo kini nga pamaagi sa paglimpyo sa mga kagamhanang lokal gikan sa kurapsyon ug kung mahitabo kini paghuman sa termino ni Pangulong Duterte, humana usab ang kalipay sa mga kawatang opisyal sa gobyerno.
Sumala ni Centrist Democratic Party (CDP) Davao City Chapter President Candido Aparece Jr., ang pakig-away ni Pres. Duterte sa kurakot nga mga opisyal usa ka preparasyon sa katukuran sa pederalismo hulip unya sa unitary system of government.
Giingon ni Aparece nga adunay kagahom ang pangulo sa pagdisiplina sa mga opisyal hilabi na sa mga elected nga nalambigit sa binuang subay sa local government code.
Nagtoo kini nga dili pamulitika ang tuyo sa pamuno-nasud sa iyang pagsilhig sa mga sagbot sa local level inay buot lang niini nga makagawas ang Pilipinas gikan sa mga ‘buwaya’ sa katungdanan.
Buot ni Aparece nga tanggalon sa puwesto ang bisan kinsang mga elected officials nga mapamatud-ang nalambigit sa sindikato ug kurapsyon isip silot kanila aron sa ingon magkinto ang uban ug magtinarong sila sa ilang mga trabaho.
Giingon pa ni Aparece kinsa usa usab sa mga nagduso sa Bangsamoro Basic Law (BBL) nga ang pagdisiplina sa badlungong mga opisyal sa gobyerno gilauman na kini daan sa katawhan kay mao kini ang usa sa mga saad ni Pres. Duterte sa miagi nga kampanya nga batukan ang kurapsyon sa nasud.
RadyoMaN Joel Viray
