Pagadian City – Nahukman nga dugangan ang kantidad sa reward money alang sa makatunol og impormasyon ug makatudlo sa nahimutangan sa mga suspetsado nga nidagit sa magti-ayong Allan ug Wilma Hyrons.
Atol sa tigom sa Provincial Peace and Order Council nga gitambungan sa 27 ka mayor sa tibook probinsya sa Zamboanga del Sur, gihisgutan ang mga lakang aron masulbad sa nahitabong pagpangdagit nga nakaapekto sa socio economic development sa probinsya.
Gisugyot ni Pagadian City Mayor Sammy Co ang paghatag og dugang reward alang sa makatudlo sa ensaktong lokasyon sa nahimutangan mga suspek ug lakip ngadto sa mga biktima.
Midugang og tunga sa milyon si Mayor Co, nisunod usab ang ubang mayor sama ni Tukuran Mayor Macario Tingson nga miangkon sa 200 mil pesos, lain pang 100,000 gikan sa lungsud sa Dimataling nga si Mayor Abel Yrauda, gipun-an og 100,000 gikan ni Mayor Eleazer Asoy sa lungsod sa Dinas, ug gidungan ni Governor Victor Yu og 100,000.
Nakompleto ang usa ka milyon nga maoy idugang sa lain pang usa ka milyon nga unang gitanyag sa probinsya.
Sa kinatibuk-an mokantidad sa Dos Milyones ang itunol sa probinsya alang sa lihitimong mga impormante.
Sa laing bahin gisugyot usab sa mga mayor ang profiling sa mga residente sa mga Barangay ilabina sa coastal area aron mahipos ang record gikan sa mga residente.
Gi-awhag usab ni Governor Yu, sa mga mayor sa p- activate sa mga bantay dagat ug ang paghatag ug dugang kahimanan ug pagbansay-bansay aron motabang pagbantay sa kadagatan.
