Davao City – Abtik nakatago sa wala masayri nga lugar ang upat ka mga kanhing magbabalaud nga sila si Satur Ocampo, Liza Maza, Rafael Mariano ug Teddy Casino human mipagula og warrant of arrest ang korte tungod sa double murder case nga ilang gi-atubang.
Hangtud karon wala pa’y lead ang mga otoridad kung asa mikagiw ug asa nga lungga nagsuksok ang upat diin ang uban nagduda nga lagmit mitapon na sila sa NPA aron ikyasan ang double murder case.
Mientras gisuspetsahan ni Gabriela Partylist Representative Emmie De Jesus sila si House Speaker Gloria Arroyo ug Pres. Rodrigo Duterte maoy nagpaluyo sa orden de aresto tungod sa double murder case nga dose na ka tuig nabasura sa korte.
Giingon ni De Jesus nga imposibleng dili masayud sila Arroyo ug Duterte sa kamanduan sa korte diin namatikdan nga walay effort ang gobyerno aron pugngan ang korte sa pagpadakop kang Maza nga buot isipon sakop man siya sa gabinete.
Nagtoo ang Gabriela Representative nga ang military nagsugyot ngadto nila ni Duterte ug Arroyo aron buhion ang mga kaso ug sikopon sila Satur, Mariano, Maza, ug Casino kung makita sa mga tinugyanan sa balaud.
Ang pagtago-tago sa upat nagpasabot lang nga buhi pa kaayo sa nasud ang balaod militar ni Marcos nga maoy gitahak sa mga opisyal sa gobyerno karon, segun sa maong opisyal.
Gibanatan pa niini ang abogado sa Citizen Crime Watch nga si Atty. Topacio human gipalanog niini nga himoon nang duha ka milyon ka pesos ang reward money alang sa makahatag og impormasyon kung asa mipiit ang upat ka kanhi magbabalaod.
Sa gibuhat ni Topacio, gibutang sa alanganin ang kinabuhi nila Ocampo, Maza, Mariano, ug Casino kay puwede matud pa silang targeton sa makakita kanila aron lang makuha ang duha ka milyon nga reward money.
Gisulti ni De Jesus nga ‘unethical’ ang anunsiyo ni Topacio nga gidugangan og laing usa ka milyon ang una nang kantidad sa reward money ug puwede kini gamiton nga basehan aron tanggalan og lisensiya sa pagka-abogado si Topacio.
RadyoMaN Joel Viray
