Nagahiwat karon sang imbestigasyon ang Regional Internal Affairs Service ukon RIAS sang Police Regional Office 6 sa kaso sang mga nagkalamatay sa anti-drug operation nga mga drug personality sa Western Visayas.
Katuyuan sini nga masiguro nga wala sang natabu nga irregularidad sa kamatayon sang natungdan nga mga drug suspects.
Ginpahayag ni PRO6 Spokesperson Supt. Joem Malong, apisar nga wala sang pormal nga reklamo nga ginapasaka batok sa mga anti- drug operatives, nagahiwat sang imbestigasyon ang RIAS agud ipakita sa publiko nga transparent ang kapulisan kag wala sang ginatago sa ila mga operasyon.
Dugang pa ni Malong, nagarespeto ang kapulisan sa tawhanon nga kinamatarong sang isa ka tawo bisan pa drug pusher ini, apang sa tion naman nga magbatu ang subject, kinahanglan man magdepensa ang kapulisan.
Nahibaluan nga base sa record sang PRO-6, 72 ka mga drug personalities sa Rehiyon 6 ang napatay bangud sa pagbatu sa mga pulis sa ginhiwat nga anti-drug operations.
