Rico Masacay gikasohan na sa Calinan Police Station

Davao City – Gikasohan na sa Calinan Police Station si Rico Masacay, usa sa duha ka suspek nga mipatay sa duha ka pulis nga sila Police Master Sergeant Tito Lague ug Police Corporal Mark Anthony Corsino, sa pagpatay nga nahitabo sa Purok 4, Barangay Lacson, Calinan District, Davao City sa miaging adlaw.

Matud ni Calinan Police Station Chief of Police Major Ricky Obenza, kasong Multiple Murder, Frustrated murder ug Direct Assault ang gipasaka batok kang Masacay, pinaagi sa inquest proceeding alas 4:30 sa hapon sa nakalabay’ng dlawa.

Segun ni Major Obenza, sa higayon magpagawas na og resolusyon ang piskalya ug masang-at sa korte ang mga kaso, ang korte mupagula gilayon og commitment order aron ibalhin sa Davao City Jail si Masacay kinsa anaa karon gikustodiya sa DCPO.

Matud ni Obenza, si Rico Masacay kauban mismo ni Matigsalog IP Leader Benao Landas, dihang gipanigbas ug gipamusil patay sila Corsino ug Lague ug pagtigbas sa mobile patrol driver nga si Donald Ombrete, kinsa anaa karon sa Southern Philippines Medical Center. Samtang si Police Corporal Leo Ken Gumanoy, nakalingkawas sa kamatayon, apan samaron sa maong panghitabo.

Sila Lague, Corsino, Gumanoy ug Ombrete, miresponde sa komosyon sa Purok 4, Lacson, apan giatake sila sa mga suspek nga gikamatay sa duha ka mga Pulis.

RadyoMaN Joel Viray