Sa interbyu sa DXDC RMN Davao kang Police Major Kirby Badilles, Chief of Police sa Sta. Maria MPS, giila niini ang biktima nga si Victor Cubelo Jr., 25 anyos, residente sa nahisgutang lugar, diin pasado alas 7:00 na kini sa buntag nakit-an sa kanal sa usa ka miaging trabahante.
Sa imbestigasyon, gikan sa trabaho ang biktima ug padulong kini sa Barangay San Agustin, asa nagpuyo ang iyang asawa ug 2 ka bulan nga anak, sa dihang kalit lamang na-overshoot ang iyang motor ug kini nadat-ogan diin natuok sa manubela ang iyahang liog hinungdan sa iyang kamatayon.
“Ang (findings) sa doktor, pag-examine niya, ang iyahang gikamatyan asphyxia due to compression of heavy object in the neck kay ang iyahang body wala may laing mga injury,” butyag ni Badilles.
Hinuon, mipasalig ang lokal nga gobyerno sa Sta. Maria nga matabangan ang pamilya samtang ipahiluna ang patay’ng lawas sa biktima.
Samtang, subling nagpahimango ang kapulisan ilabi na sa mga motorista nga siguradohong dili maka-inom kung magmaneho diin gituohang nakainom ang biktima. Kinahanglan usab ang pagsuot og gears sama sa helmet aron maproteskyonan ang kaugalingon panahon sa pagbiyahe.
“Dili gyud nato sagolon na’ng inom ug pag-drive. Isa gyud na sa pahimangno nga importante kaayo. Unya og mo-drive gani ‘ta sa motor, kinahanglan kumpleto gyud ‘ta. Gawas sa nga lisensyado ‘ta ug rehistrado ang atoang motor, dapat naka-safety gear ka,” sulti sa pulis.
RadyoMaN Kirby Manzon
