Davao City – Patay ang driver sa motorsiklo samtang angol ang duha niini ka mga pasahero ug mitugpa karon sa Southern Philippines Medical Center (SPMC).
Sa blotter sa Tugbok PNP, nahitabo ang pagsungag sa motorsiklo ug PUJ alas 10:45 sa kagabhion sa Davao-Bukidnon highway sa Tugbok, Davao City.
Patay ang driver sa Suzuki Raider 150 nga si Noli Calisadan, 27 anyos, nagpuyo sa Elenita Heights, Catalunan Grande, ug angol ang iyang duha ka mga pasahero nga sila si Regino Tulyaga Jr., 27 anyos, ug Cris Jhon Monteclaro, 31 anyos, pulos nanimuyo sa Brgy. Tacunan, Davao City, human mibangga ang ilang motorsiklo sa PUJ nga gimaneho ni Hilario Dela Torre.
Sa imbestigasyon sa Traffic Section sa Tugbok PNP, ang PUJ gikan sa Ulas padulong Calinan samtang ang motorsiklo gikan sa Calinan padulong sa Ulas ug sa dihang mi U-Turn ang PUJ natigayon ang pagkabangga.
Nasayran nga walay mga helmet ang mga nagsakay sa motorsiklo.
Ang patay nga lawas ni Noli alzada gidala sa Angel Funeral Parlor sa Calinan ug gikustodiya sa Tugbok PNP ang nakabangga nga driver.
RadyoMaN Erin Lumosbog
