Roxas City, Capiz- Nakilala na ang isa sa mga suspek nga responsable sa nagluntad nga robbery hold-up incident sa Barangay Dinginan kag Barangay Bolo.
Suno kay Supt. Dante Tayco, nakaagi preso ang isa sa mga suspek nga may dala nga armasluthang samtang ginahibalo pa ang identity sang upod sini nga driver. Samtang namalibad anay si Tayco nga hingadlan ang suspek agod nga indi maapektohan ang ginapatigayon nila nga follow-up investigation.
Sa madumdoman, nagpadulong sa Roxas City PNP ang 39-anyos nga biktima nga si Brando Lozada, agod ipa-rekord ang natabo nga paghold-up sa iya sang duha ka mga suspek samtang ini ang nagapauli sa ila poluy-an sa barangay sang Bolo.
Panaysayon sini, siya ang ginpondohan sang duha ka mga suspek kag gintutokan sang armasluthang kadungan sang pagkuha sang mga gamit sini. Kalakip sa nakuha sa amo nga biktima ang apat ka mga cellphones, tablet, ATM, mga IDs, charger, 500 pesos nga cash kag iban pa nga mga importante nga dokumento.
Wala pa makontento ang mga suspek, siya ang ginlampusan sang armasluthang antes ang mga ini nagpalagyo.
Samtang sa pihak nga bahin sa Brgy. Dinginan, mga alas 9 sang gab-e sang nagalakat sa pauli ang biktima nga si Mary Joy Oloroso, 31-anyos kaupod ang lima ka iban pa sang ang mga ini ang ginpondohan sang duha ka mga suspek. Ginsilingan ang mga ini nga “indi na magpalag” kadungan sang pagdeklarar nga hold-up.
Natigayon nga makuha sa biktima ang P200 pesos nga cash kag cellphone.
Suno sa isa sa mga nakasaksi sa insidente nga si Pedro Alvarez, nagpalupok pa ang mga suspetsado antes nagpalagyo.
Ang mga suspek ang nakasakay sa puti nga motorsiklo nga anggid man sa paglaragway sang nahauna nga biktima sang robbery hold-up sa Brgy. Bolo.
Padayon pa ang imbestigasyon sang mga kapulisan sa amo nga insidente.
