Malaybalay City, Bukidnon – Daw emosyonal nga nagpaabot sa iyang dakong pagpasalamat si Station Manager Richard S. Villaronte sa mga tawo anaa sa likod sa pagkadaug sa RMN DXMB Malaybalay sa Henry R. Canoy Excellence kon HRCE Award 2017 alang sa secondary AM category.
Sa iyang mensahe gipasalamatan ni Manager Villaronte ang Labaw nga Makagagahom sa giya nga iyang gihatag sa mga staff sa RMN Malaybalay.
Nagpasalamat usab kini sa mga suking tigpaminaw sa RMN nga maoy nahimong rason ug inspirasyon sa mga pagpaningkamot sa mga empleyado nga mahatag ang tinud-anay nga serbisyo publiko ngadto sa mga katawhan sa probinsya sa Bukidnon.
Gidugang pa niini nga wala niya laumi nga madawat ug makadaug ang RMN Malaybalay sa mao nga prestihiyosong pasidungog tungod kay gihimo lamang usab sa mga empleyado ang tahas nga gisangon sa kompanya tungod kay kabahin kini sa trabaho isip mga empleyado.
Alayon niini nagpa-abot usab sa iyang pagtimbaya si RMN DXBC Butuan Station Manager Ramil Bangues sa mga staff sa RMN Malaybalay.
Ang HRCE Award gihatag sa kadumalahan sa RMN, Inc. ngadto sa RMN station nga nakakuha ug pinakadakong puntos sa gihimo nga evaluation kada tuig.
Apil sa mga criteria o basehan sa mao nga pasidungog mao nga naka-abot sa gitakda nga quota sa local sales, pagpabilin nga number 1 sa mga survey (ranking ug ratings), pagpahigayon ug team building sa mga empleyado, paghimo corporate social responsibility (CSR), community involvement ug uban pa.
Gihatag ang pasidunggog kagabie atol sa tinuig nga Station Manager’s Conference sa Radio Mindanao Network kon RMN.
Sa maong kumperensiya nagtigom ang top management sa RMN sa pagpanguna ni President ug CEO Eric S. Canoy kauban ang mga tag-as nga opisyal sa network ug tanang mga station managers sa AM ug FM stations sa ilawom sa RMN, Inc. nga makaplagan sa Luzon Visayas ug Mindanao.
Ang tema sa Manager’s Conference sa RMN mao ang “Managing the Future” nga nakatuon sa mga pamaagi kung unsaon nga mas mapa-ayo pa ang paghatod serbisyo niini sa katawhang Pilipino sa mga musunod pang mga panahon.
Ang RMN Manager’s Conference gihimo kada taon ug karong tuiga 2018 gihimo sa sa General Santos City.
Ania ang kompletong listahan sa mga awardees sa 2017 Henry R. Canoy Excellence Awards sa RMN Networks:
1. DXDC 621 RMN Davao – Station Manager Leo Mamalias Daugdaug (Primary AM Category),
2. IFM Iloilo 95.1 – Station Manager Rhoderick Cejes (All FM Category),
3. RMN Malaybalay – Station Manager Richard Soriano Villaronte (Secondary AM Category); ug
4. Online Content Champion, RMN Iloilo – Station Manager Ronel Sorbito.
