General Santos City— Andam nga atubangon ni Police Senior Superintendent Romeo Ruel Berango, OIC City Director sa GensanCity Police Office ang kasong ipasaka kaniya ni Gensan City Councilor Atty. Jeng Gacal nga sumala pa paglapas sa R.A 9649.
Sumala kang Col. Berango nga mas labing maayo kung ipasaka ngadto sa Ombudsman aron nga iyaha usab nga mabutyag ang iyang side gumikan daw sa dili man kini paminawon sa sangguniang panlungsod.
Pamahayag ni Col. Berango nga sila sa kapulisan ang igo lang nga nagatuman sa balaud ug dili nila trabaho ang pag-*interpret *sa balaud. Gani alang kaniya nga mas maayong sulbaron una sa lokal nga panggamhanan ang isyu sa concurrence sa PCSO aron nga makalihok sila kung pahigayunan ug operasyon ang STL sa dakbayan.
Dugang pa niya nga isip kapulisan, ang direktibang gikan sa Local Chief Executive maoy ilahang tumanon, pasabot nga dapat si GenSan City Mayor Ronnel Rivera ang gihangyo sa mga konsehal nga muhatag ug direktiba sa kapulisan nga magpahigayon ug operasyon sa STL ug wala giderekta ngadto kanila.
