Cien bata del Mulu-Muluan Elementary School bajo na Mercedes District el ya recivi temprano fascua desde con el numero radio network el RMN/IFM durante el feeding program enantes aga.
El programa parte del aca 66 anniversario del mencionao network donde el maga bata fuera ya sale beneficiao na feeding, ya recivi tambien maga regalo como school supplies y hygiene kits.
Ya entrene tambien el maga bata con el bunito magic show y cuantos juego ya presenta el RMN/IFM.
El actividad ya encabesa el station manager del DXRZ-RMN si Joel Toledo Sanson junto con el maga partners del programa como el Family Fried Chicken Restaurant, Task Force Zamboanga, Consejo del barrio Mercedes na liderato di Capitan Arthuro Natividad Alejandro, el teaching staff del escuela ta encabesa el activo principal si Dr. Olga Amolo-Guevara y otro maga sponsors.
Visible el alegria na carillo del maga bata mientras ta saboria el sabor del spageti y chicken joy del Family Fried Chicken y cuando ya recivi maga regalo.
Si Dr. Guevara tambien contodol corazon ya rendi gracias con el RMN/IFM y conel maga sponsors por el buen corazon para con el maga bata ta entra na mencionao escuela.
