Tapaz, Capiz- Duha ka persona ang kumpirmado nga patay sa shooting incident sa Rizal Sur, Tapaz alas 4:30 sang hapon.
Sa pagpakig-angot sang news team sa hepe sang Tapaz PNP nga si Police Senior Inspector Edwin Luces, ginkilala ang mga ginbawian sang kabuhi nga amo sanday Jerry Francisco y Gardose, 43-anyos sang Sitio Carbasana, Rizal Sur, Tapaz kag Romulo Villanueva y Florentino, 45-anyos sang Brgy. Agloloway, Jamindan Capiz.
Suno sa inisyal nga impormasyon, nagluntad ang indi paghangpanay sa tunga sang suspek kag biktima nga ginsundan sang paggabot sang ginasukbit nga armasluthang.
Ginsiling ni Luces nga indi pa sa subong matumod kun sa diin nga parte sang lawas ang naangkon sang mga ini nga kapilasan.
Samtang napilasan man si Kagawad Alejandro Tupaz nga nagtambag sa amo nga kinagamo.
Nahibaloan nga kapin sa 40 ka kilometro ang kalayuon sang nasambitan nga barangay halin sa munisipyo sang Tapaz.
Padayon pa ang tul-id nga imbestigasyon sang mga kapulisan sa amo nga insidente samtang nagpadulong na sa amo nga lugar ang mga katapo sang Tapaz PNP.
[Note]: Developing news . . .
