Davao City – Kasama, sa matag adlaw, kamo, ang among kanunayng kauban sa kahanginan, apan pinasahi nga serbisyo publiko ang among dalit kaninyo labi na sa panahon sa Kapaskuhan.
Niadtong unang adlawng Sabado pa lang sa Disyembre, ang tibuok pwersa sa DXDC RMN Davao ang midalit og sorpresa, pinaagi sa pagpanaygon kaninyo nga among mga suking tigpaminaw. Apan inay nga kamo ang muhatag, mas ikalipay namo nga kami ang muhatag og regalo alang kaninyo.
Amo usab nga nabati ang inyong kalipay ug nakit-an ang inyong mga pahiyom. Ug ang tiunay nga gugma sa inyong pagpasulod kanamo sa inyong mga panimalay.
Gani dili mahuman sa Disyembre 25 o adlaw sa Pasko ang among pagpanayon. Tungod kay sa amo, adlaw-adlaw Pasko, maong manaygon gihapon mi sa umaabot nga Sabado.
Pinaagi sa DXDC Panaygon Team, personal usab namong nadunggan ang inyong mga nagkadaiyang pangandoy o mga wishes karong Pasko.
Amo usab nga gikalipay ang mga personal gyung mibisita sa istasyon sa DXDC, ang inyong numero unong sibyaanan, sa pagsab-it sa inyong mga Christmas wishes ug nagpapicture sa inyong mga paboritong mga radio personalities.
Gani, niadtong December 21, 2018, nagmalampuson ang gipahigayon nga RMN Christmas Tree Lighting 2018 sa RMN Davao Broadcast Center ingon man, sa tanang RMN AM ug FM stations sa tibuok nasud. Gipangunahan ang pagpasiga sa RMN Christmas tree dinhi sa Davao ni Mr. Leo Daugdaug, ang station manager sa DXDC ug ni Mr. Gerry Lumantas, ang station manager sa 93.9 iFM Davao ug uban ang tibuok staff sa RMN.
Diin eksakto alas-5:30 sa hapon, dungan nga gisindi-an ug gipasiga ang Christmas tree sa matag sibyanan kung asa nakasab-it ang daghanan ug nagkalain-laing wishes sa mga tigpaminaw.
Diin ang pagpasiga niini, nagsimbolo nga atong dungan nga gisind-an ang inyong mga wishes kun pangandoy sa pagsalig ug pagtuo nga matuman kini pinaagi sa tabang sa Ginoo.
Gawas usab sa mga kalingawan o sa mga aktibidad nga among ginadalit sa mga barangay sa syudad, gilusad karong tuiga sa Radio Mindanao Network (RMN) ang RMN Big Christmas 2018! Diin ubay-ubay na ang nakadaug sa maong promo. Ug dili lang kana, higanteng mga surpresa ug mga premyo ang nagpaabot sa atong mga listeners.
Diin hangtud bulan pa sa Pebrero sa 2019 ang atong promo diin ipahigayon usab ang grand draw. Kapin P2-Million nga kantidad sa premyo ang ipanghatag. Ug.. basin ikaw ang ma-celebrate sa Bag-ong Tuig nga adunay brand new nga house & lot. Maong paminaw lang kanunay, walay buhi-ay, sa DXDC RMN Davao, madunggan sa 621kHz sa inyong AM radio dial, ug aron updated kanunay, i-like ug i-follow ang Official Facebook Fan Page nga DXDC 621 RMN Davao.
Kasama lauman pa ang daghanang sorpresa nga among mapaabot kaninyo sa umaabot pang panahon. Salamat kaayo sa inyong walay paglubad nga suporta. Kamo ang tinuod nga number 1!
Merry Christmas, mga Kasama! Dalagyon ang atong Dios, ang atong personal nga Ginoo ug Manunubos!
RadyoMaN Kirby Manzon
