GISUGDAN na sa Probinsya sa Bukidnon ang evaluation/validation sa Road Clearing Operations sa mga munisipyo ug syudad niadtong-Pebrero 16, 2021 hangtud karong adlawa Pebrero 18, 2021, subay sa DILG Memorandum Circular Numbers 2020-027 pinitsahan Pebrero 7, 2020 ug 2020-145 pinitsahan Oktobre 27, 2020.
Nag-unang gisusi sa Evaluation/Validation Team kung aduna ba’y iligal nga naka-parking nga mga sakyanan sa mga gidili nga lugar sama sa sidewalks, paths, ug mga lugar nga dli angay parkingan, vehicular terminals, vending sites, mga balay nga nakalapas ug nakababag sa road-right of way, mga gate ug mga kalihukan nga makababag sa dalan, mga nakalapas nga tindahan, signages ug advertisements, mga barangay structures, pagbulad sa mga humay ug uban pang abot sa umahan, pagbutang sa construction materials sama sa balas, steel bars, semento, mga kahoy, mga butang nga wala na gipanggamit o junked items, ug uban pang mga estraktura, materyales ug mga kalihukan nga nakababag sa kadalanan.
Base sa DILG MC No. 2020-145, gilauman ang full implementation sa pagsunod sa guidelines nga gitakda sa Part II DILG MC No. 2020-027 alang sa Road Clearing Operations sa Bukidnon sanglit napaubos man kini sa Modified General Community Quarantine (MGCQ), subay sa Community Quarantine Classification. Gilauman nga makita ang mahinungdanong resulta niini nga mga pagpatuman sa kamanduan sulod sa 75 ka adlaw gikan sa pagsugod niadtong Nobyembre 16, 2020, kung aha mohimo gilayon sa cross-posting of validation teams ang DILG Regional Office sa Marso 6, 2021 ug diha-diha mosumite sa maong validation report ngadto sa Office of the DILG Secretary sa Marso 9, 2021.
Ang evaluation/validation team gilangkuban sa mosunod: mga buhatan sa DILG, PNP ug BFP ingon man sa Provincial Engineering Office ug sa PGO-Public Affairs, Information and Assistance Division.
