Davao City – Adunay tulo ka rason makonsidera nga posibleng hinungdan sa kalit nga pagsaka sa mga insidenteng bangga sa kadalanan dinhi sa dakbayan nga nahitabo sa miaging semana.
Matud ni kanhi Inter-Agency Council for Traffic (I-ACT) Deputy Director Elmer Organo, naglakip kini sa kakulang sa road courtesy ug kakaulang sa disiplina maingon man ang pagdaghan sa mga motorista nga nagbiyahe pasulod ug pagawas sa dakbayan sa nakalabay’ng semana.
Matud ni Organo, masabtan nga gawas nga hometown ni Pres. Rodrigo Duterte ang Davao City, mao usab kini ang giilang capital kun kabisera sa Mindanao, busa normal lamang nga daghan ang mga biyahero rason usab kun nganong taas kaayo ang mga aksidente denhe sa syudad.
Na-alarma si Organo sa iyang nasayran nga mikabat sa 170 road crashes ang nahitabo dinhi sa dakbayan diin dili kini normal nga sitwasyon alang sa usa ka semana nga mga panghitabo.
Sa maong mga insidente, ang road crash sa Toril ug Matina Pangi ang pinaka grabe gumikan sa gidangatan sa mga behikulo ug pagkamatay sa walo ka tawo nga sakay sa Mindanao Star Bus ug usaka Forward truck.
Matud ni Organo, ang ingon niini kadaghan dili normal sa usa ka semana nga diin kini nagpasabot lamang nga daghan na gayud ang mga iriesponsableng driver nga nagamaneho sa kadalanan.
Aron matuldokan ang dugoong mga disgrasya, dili lamang kay patas-an ang multa inay bakwion gayod ang driver’s license sa kamot sa mga abusadong driver isip silot ngadto nila, segun sa kanhi opisyal sa I-ACT.
RadyoMaN Joel Viray
