Davao City – Nabalintong kaganinang alas-5:40 sa kabuntagon ang usa ka Ford Ranger pick-up human nisarasay tungod sa kadangog sa pasubida nga porsyon sa Diversion Road gumikan usab sa niagas nga mantika gikan sa usaka oil tanker gipanag-iyahan sa Green Leaves Oil Mill sa Panabo City.
Ang SUV nga gimaneho ni Ricarte Abanira ug gipanag-iyahan ni Ram Lamang nga taga Bankal padulong unta kini sa south area diin iyang nasundan ang tanker nga nagtulo ang mantika diha sa kalsada.
Gumikan sa kadangog, nadakin-as ang sakyanan hangtud nga nabalintong ug mitabok didto sa pikas lane.
Hinoon, walay gikatahong casualty sa maong hitabo samtang mga personahe sa Bureau of Fire Protection (BFP) ug City Transport and Traffic Management Office (CTTMO) nisabwag gilayon ug bagaso sa mantika sa karsada ug temporaryong gisirad-an ang nasangpit nga lane.
RadyoMaN Erin Lumosbog
