Davao City – Angay sumala pang masiguro nga legal ang usa ka investment company o regulated sa gobyerno aron adunay kasegurohan ang mga investors niini pag-abot sa panahon.
Sumala pa ni Alex Roldan, Regional Director sa Department of the Interior and Local Government (DILG)-XI, iligal ang pag operate sa usa ka negosyo kung dili kini magpa regulate sa gobyerno.
“Dili pwede nga kung maghimo ta’g investment, dili ‘ta magpa regulate. Buot pasabot nga imong ipakita ngadto sa mga regulators, ang Securities and Exchange Commission (SEC) ug ang Bangko Central, nga tinuod ang imong investment,” saysay ni Roldan.
Gipasabot ni Roldan nga angay masayud ang mga investors kung paunsa ginapalihok ang ilang kwartang gi-invest ug ang sistema sa gisudlang kumpanya.
“Duna kay mga tawong kabalo mupadagan niani. Asa nimo dal-a ang pundo, ang investment nga gikan sa mga tawo. Unsay mga istratehiya aron bayaran ug dili maalanganin ang mga investors. Buot pasabot dunay total transparency sa ilang operation nga kini regulated,” tataw ni Roldan.
Giklaro sa opisyal nga ang buot lamang sa gobyerno nga masigurong maprotektahan ang katawhan o ang mga investors tungod kay hangtud nga dili regulated ang nahisgutan sa gobyerno, makonsiderang iligal ang mamahimong operasyon niini ug dili magukod sa nahisgutan ang ilang gi-invest nga kwarta panahon nga magbaton na kini og problema.
“Dili ‘ta manghilabot sa ilang pondo kay ila man na nga kwarta. Ang ato lang dinhi ang pagsiguro nga ang ilang investment protected. Mao na nga gi-require nato kining mga nagpasiugda niini nga musunod sa atong balaud kay anaa diha ang proteksyon. Without that, illegal sila nga mag operate and they can be closed anytime,” saysay ni Roldan.
RadyoMaN Kirby Manzon
