Davao City – Alang sa hingpit nga rehabilitasyon sa Islamic City of Marawi nga gilubok sa lima ka bulan nga grabeng gubat, gisugyot karon ni KABAYAN Partylist Representative Harry Roque ang pag-establisar sa pagatawgon nga ‘Tindig Marawi’ Rehabilitation Fund.
Sa interbyu kaniya sa tulumanong ‘Straight to the Point’, gisaysay ni Roque nga niduso siya ug duha ka mga sugyot-balaudnon gilangkuban sa ‘Karapatan ng mga Bakwit’ ug ang ‘Tindig Marawi’ rehabilitation, reconstruction and rebuilding scheme.
Si Roque, kinsa gihugon-hugonang maoy mamahimong bag-ong presidential spokesperson ni Pres. Rodrigo Duterte hulip kang Undersecretary Ernie Abella nagtug-an nga siya nisugyot sa P10B mainstreaming funds sarang magamit alang ning maong katuyuan sa massive Marawi rebuilding efforts.
Tumong niini mao nga hatagan og igong kahigayunan ang mga bakwit nga makabalik na sa nagkadaiya nilang panimalay sa Marawi pinaagi sa tabang sa gobyerno ug aron usab makapadayon sila sa ilang panginabuhi.
Nagtoo ang kongresista nga gawas sa gikasugyot nga kantidad sa ‘bridge financing,’ manginahanglan pa ug dugang hinabang ang mga nadislokar nga katawhan kun mga Internally-Displaced Persons (IDPs) haron sila makatindog ug mobalik sa normal ang panginabuhian.
RadyoMaN Jason Amisola
