Sa interview sa RMN ngadto kang Lt. Col. Manolito Santos, ang Director sa 1003rd Community Defense Center 10RCDG, RESCOM, Philippine Army, gibutyag niini nga nahimong pilot area ang Bukidnon sa mao nga kampanya kung asa pito na ka mga tulunghaan ang gipahigayunan nila ug lecture kung unsay bentaha kung ROTC ang kuhaon sa pag-enroll sa mga estudyante sa kolehiyo.
Matud ni Col. Manolito nga usa sa bentaha sa ROTC mao nga ang usa ka indibidwal mahibal-an ang bili sa displina, respeto, patriotism, nasyonalismo, pagsunod sa konstitusyon ug ang labing mahinungdanon ang pagkamaayong ehemplo kon pagbaton sa leadership skills.
Nasayran nga ang ROTC usa lamang sa component sa Republic Act. 9163 kon National Service Training Program kon NSTP Law kauban ang LTS ug CWTS nga mahimong kapilian sa mga estudyante sa pagtungha nila sa kolehiyo.
Sa karon, aduna nay 14,000 ka mga reservist sa probinsya sa Bukidnon kung asa 600 ang aktibo.
Karong tuiga, adunay mo-gradwitay sa ROTC nga mukabat sa 2,000 ka estudyante nga nagtungha gikan sa mga nagkadaiyang unibersidad ug kolehiyo sa Bukidnon.
