Davao City – Sa pagbalik sa curfew, mi-ani usab og daghang reaksyon ug komento ang mubo nga oras alang sa Roxas Night Market ning syudad sa Davao alang sa mga vendors ug sa mga mobisita sa lugar.
Adunay mga komento sa netizen nga kulang ra kaayo ang duha ka oras unya magsugod usab ang curfew og alas 7:00 sa gabii rason nga maglisod na ‘sab sa pagsakay.
“Sakto paghuman og kaon o laag kay 7pm na, before ka moparag jeep naa nay moposas o modakop nimo,” kumento ni Ken Koy.
Sugyot usab sa usa ka Tabigue Mera nga didto nalang duol sa ilang balay maninda aron dili mahimong limitado ang oras sa ilang negosyo.
Subay sa anunsyo sa City Government of Davao pinaagi ni Davao City Mayor Sara Duterte-Carpio, alas 5:00 sa hapon hangtod alas 7:00 sa gabii o duha (2) ka oras lamang nga makapaninda ang mga negosyante.
Gipaniguro sa lokal nga gobyerno nga abri ang lugar sa maong oras alang sa mga negosyante ug anaa kanila ang desisyon kung sila gusto nga maninda.
“Ang sa atoa lang is open ang Night Market for them (vendors) kung gusto nila. Kung dili, we will not ‘pugos’ (force them),” segun sa Alkalde.
Una nang gipasabot sa Mayor nga ilahang prayoridad sa pagkakaron ang public health concern labi na nga nagkataas ang kaso sa Coronavirus Disease 2019 (COVID-19) sa dakbayan sa Davao.
RadyoMaN Kirby Manzon
