General Santos City–Gibali-bali ug gisa sa mga senador sa nasud ang City Assessors sa Gensan nga nga si Leonardo Dinopol atul sa pagpadayon sa imbestigasyon bahin sa Road Right of Way Scam nga gipahigayon sa Sangguniang Panglungsod kagahapon.
Unang gikwestyon ni Senador Manny Pacquiao kung kaila ba ni Dinopol si Wilma Mamburam nga gikaingong lider sa sindikato ug financiar matud pa sa pagpahimo ug peke nga mga titulo nga ilang gigamit sa anomalosong Road Right of Way Project.
Giangkon hinuon ni Dinopol nga iyang nakaila ug nakahimamat na si Mamburam human nga midangop kini sa iyang buhatan dala ang mando gikan sa korte sa Cotabato City nga mag-isyu siya ug Tax Declaration.
Kalabot niini giangkon usab ni Wilma Mamburam nga nagkuha sila ug tax declaration ngadto na sa City Assessor’s Office ilawom sa pagdumala ni Dinopol. Kini matud pa ang titulo sa iyang apohan apan dili niya makumpirma kung kini ba usab ang titulo nga gihuptan sa usa ka claimant nga si Boy Olarte.
Kalabot niini dili na matud pa mahinumduman ni Dinopol kung duna bay dalang titulo Kaniadto Si Mamburam apan iyang gipaniguro nga duna kini dalang order gikan sa korte.
