iFM Laoag* – *Pormalen a nagwithdraw ni Ilocos Norte 1st District Congressman Rudy Fariñas iti kandidatorana kas gobernador iti probinsya ti Ilocos Norte.
Nagturong daytoy iti COMELEC Ilocos Norte kaduana ti annakna ket iti oras ti alas 9:30 ditoy a pinirmaanna ti withdrawal form iti nasao nga ahensya ti gobierno.
Kinuna ni Fariñas, 67 ti tawenna, nataengan unayen para ti politika. Nangted pay ti mensahe isuna ken ni Senior Board Member Matthew Marcos Manotoc, nga ituloyna iti serbisio nga agpaay kadagiti kaprobinsiaanda.
Innayunna pay nga awan iti sakit ti nakem wenu gurana kadagiti Marcos ken ti desisionna ket napagsaritaanen ti pamilyana.
Ni Fariñas ket nagserbi iti gobierno iti 39 a tawen kangrunaanna kas opisial iti probinsia ti Ilocos Norte ken malagip nga isuna ti kaubingan a mayor iti siudad ti Laoag iti tawen a 28 idi 1980.
Nupay kasta, agtultuloy latta iti kandidatora dagiti tallo nga annakna intuno May 2019 elections iti nadumaduma a posision iti gobierno.
Awan pay ti reaksyon ti pamilya Marcos kangrunaanna ni Ilocos Norte Senior Board Member Mathhew Marcos Manotos nga anak ni Governor Imee Marcos.
Bernard Ver, RMN News
