Davao City – Gipailawom sa Run After Contribution Evaders (RACE) karong adlawa ang mga establisimiento nga nakalapas sa Social Security Act kun R.A. 8282 sa may dalang Uyanguren ning syudad sa Davao.
Sa pagpanguna ni Social Security System (SSS) President and CEO Emmanuel Dooc, gi-usa usa ang mga establisimiento sulod sa usa ka iladong department store sa Uyanguren kinsa wala nagregister sa ilang mga employers nga wala gabayad og saktong kontribusyon ug wala gapanghatag og tukmang benepisyo ngadto sa ilang mga employees.
Gani gipang-isyuhan sila og show cause order nga gikinahanglan husayon sulod sa 15 ka adlaw.
Sa interbyu kang Honey Jamali, minyo, mag-unom na ka bulan isip cashier sa usa sa gi-raid nga tindahan, ginadeploy sumala pa sila pinaagi sa agency kinsa mag-assign kanila sa usa ka establisimiento.
Dugang niini, wala siya nasayod kung kinsa ang tag-iya sa iyang ginatrabahuan ug wala matud pa ang manager atol sa gipahigayong raid.
“As long as the number of delinquent employers remain high, this (RACE) will be continuous,” segun ni Dooc.
Ginalauman sa SSS nga mubisita ang pito ka mga employers sa maong mga establisimiento nga ilang nabisita aron magpatabang kanila ug motuman sa SSS law.
Ang mga dili mu-comply mamahimong subject sa criminal prosecution ug makulong sulod sa 12 ka tuig.
Sa record sa SSS, adunay 7,755 ka employers dinhi sa Davao diin 1,132 niini ang regular nga gabayad, 8,169 ang aduna pay batal, ug 119 niini ang ilang ipailawom sa RACE.
RadyoMaN Jason Amisola
