Dumarao, Capiz – Pilason ang isa ka lalaki matapos ini ang nadisgrasya sa ginkawat nga motorsiklo sa Barangay Bungsuan, Dumarao, Capiz.
Nakilala ang suspek kay Ryan Abian, yara sa legal nga pang-edaron kag residente sang Concepcion, Iloilo.
Suno sa imbestigasyon sang Dumarao Municipal Police Station, natalupangdan sang mga residente nga ginkawat sang amo nga suspek ang naka-park nga motorsiklo nga ginapanag-iyahan ni Elizabeth Cabison kabangdanan ini ang ila ginlagas tubtob sa direksyon padulong sa Dacuton, Dumarao.
Apang gulpi ini nga nagliko pabalik sa banwa sang Dumarao apang pag-abot sa Barangay Bungsuan, wala makontrol sang suspek ang manibela sang motorsiklo kabangdanan sang pagkabunggo sa naka-park nga motorsiklo.
Bangud sa insidente, nag-angkon sang mga pilas sa iya lawas kag nawong ang suspek nga si Abian.
Ini subong ang naka-hospital arrest sa balay-bululngan sa Pototan, Iloilo.
