i Balita
May 11, 2020
(Photo from web)
SA PANAHON SANG COVID NGA MAY LIQUOR BAN, PILA KA MGA PULIS AMO MAN ANG GINATUDLO NGA NAGALAPAS
Nabutang sa kontrobersiya ang pila ka katapo sang kapulisan sa Proninsiya sang Iloilo, matapos nga maulamid sa paglapas sang liquor ban kadungan sang ginapatuman nga Enhanced Community Quarantine sa tunga sang COVID -19 pandemic.
Nahibaluan nga nagapadayun subong ang inbestigasyon sa mga miyembro sang 2nd Iloilo Police Mobile Force Company (IPMFC), sa Camp Jalandoni, barangay Zerrudo, Sara, Iloilo matapos nga nakuhaan sang litrato nga naga –inom sa Closing and Awarding Ceremony sang 2020 Sports Festival sang PRO-6 Reactionary Standby Support Force (RSSF) sang nagligad nga bulan sang Abril.
Kabahin sa mga gina-imbestigaran kag naka- floating status ang mga miyembro sang 2nd IPFMC kag ang Team Leader nga si Maj. Terence Paul Sta. Ana.
Kagab-I, Mayo 8, arestado man ang pulis nga na-assign sa Campo Delgado matapos nga madakpan sa check point sang mga kabaro sini nga pulis sa Barangay Cabugao Sur sa banwa sang Sta. Barbara nga may karga nga 30 ka karton sang makahulobug nga ilimnon.
Detain tubtob subong sa Sta. Barbara, Municipal Police Station si Police Staff Sgt. Paul Pinggoy kag ang sibilyan nga si Adolfo Patiam Jr. lunsay pumuloyu sang Barangay Sebastian sang nasambit man nga banwa.
Ginahanda na sang Sta. Barbara Municipal Police Station ang kaso batok kay Pinggoy kag Patiam bangud sa pagtransport sang makahulobog nga ilimnon apisar sang ginapatuman nga liquor ban sa idalum sang Enhanced Community Quarantine.
