Ginkumpirmar sang bag-o pungko nga Vice Mayor sang banwa sang Sto. Niño nga si Wilfredo Dimzon nga si Paul Philip Matinong ang ikaduha nga bata ni former Mayor Pablo Matinong ang napili nila nga magpuno sa bakante nga posisyon sa Sangguniang Bayan.
Suno sa bise alkalde ini ang desisyon sang partido tungod nagapati sila nga may kapasidad ang amo nga bata ni Mayor Matinong tungod nagaobra man ini sa munisipyo kag nakit-an nila nga luyag man sini nga magserbisyo sa katawhan.
May-angot sini, natalana nga magpungko bilang ikapito nga konsehal sang Sto. Niño si Paul Philip pagkatapos sang lubong sang iya nga amay sa katapusan sang sini nga bulan.
Ginatindugan naman ni Vice Mayor Dimzon nga politika ang motibo sa pagpatay kay Mayor Matinong sang Hulyo 10, 2020.
Ginpasiguro man niya nga padayunon nila ang gin-umpisahan sang anay alkalde kag ginhingyo man sini ang suporta sang Sto. Niño para sa pag-asenso sang banwa.
