Nasunog ang usa ka sakayan pandagat adunay markang Ocean Jazz Light Resort boat nasayran nga naglayag kini sa kadagatan gikan sa lungsod Labason padulong sa lungsod sa Sindangan, ning atong probinsya sa Zamboanga del norte.
Matod pa pag abot nila sa lawod sakop sa lungsod sa Salug gihampak kini sila ug dako nga balod hinungdan nga nagka troubleshoot didto duol sa makina sa maong sakayan ug misilaob na hinuon ang maong sakayan.
Ang nahisgutan nga sakayan gipanag-iya ni Alberto Laput, hingkod ang pangidaron, usa ka negosyante ug residente sa Borias, Masbate ug gilawig kini ni Jolito Tumarong Limbaga, anaa sa saktong pangidaron, Samtang ang duha ka crew naila nga sila si Edgar Deljero Hassan, 43 anyos, usa ka ulitawo, ug si Wendylino Sabanal Redoble, 50 anyos, pulos molupyo sa lungsod sa Labason.
Ang mga tripulante naluwas kini sa mga bantay dagat sa pagpangulo ni Rolly Estebat ug gidala ngadto sa Salug MPS alang na sa dugang pang imbistigasyon.
