Patay ang usa ka sakop sa Civilian Volunteer Organization o CVO human gipusil sa Balite street, Barangay Bugo ning syudad sa Cagayan de Oro niadtong Sabado.
Matud ni Police Captain Mario Mantala, Hepe sa station 6 Puerto nga ang biktima nailang si Antonino Canatoy Salaan, sakop sa CVO sa barangay Bugo ug barker sa terminal sa motorized sikad sa lugar.
Gibutyag ni Mantala nga gipusil ang biktima sa mga lalaking sakay sa improvised nga motorsiklo nga naka maskara ug helmet.
Sa inisyal nga imbestigasyon sa mga polis, nasayran nga walay track record ang biktima ug nag-negatibo usab kini sa illegal nga droga.
Sa karon, padayon pang gisuta sa mga polis ang motibo sa nahitabong pagpusil sa biktima apan usa sa mga anggulo nga ilang gitutukan mao ang istriktong pagdala niini sa terminal.
Si Salaan nakaangkon og samad sa tiyan ug ulo ug gideklarang dead on arrival sa Sabal Hospital sa Puerto.
