Usa ka miyembro sa New Peoples Army o N-P-A ang misurender sa 8th Infantry Battalion Philippine Army sa Sabangan Patrol Base sa Barangay San Luis, Malitbog, Bukidnon.
Kini mao ang 32 anyos nga si Anaclito Sanugan Sagula Jr., alyas Jepy nga taga Purok 1, Barangay Hagpa, Impasug-ong, Bukidnon.
Nasayran nga kauban si Ka Jepy sa mga N-P-A nga nakig-engkwentro niadtong miaging mga adlaw sa Malitbog, Bukidnon kung asa usa sa ilang kauban ang napatay sa militar.
Atol sa pagsurender ni Ka Jepy, dala niini ang usa ka AK47 rifle ug tulo ka magazine nga adunay 88 ka mga buhing bala.
Sa karon, nakig-kordinar na ang 8th IB sa lokal nga kagamhanan sa Malitbog ug sa mga tribal leaders alang sa panginahanglan sa maong surenderee.
Makadawat usab og cash assistance nga 15-thousand pesos si Ka Jepy ug livelihood assistance nga 50-thousand pesos ubos sa balaod nga nakalatid sa Philippine Army.
Gawas niini, madawat usab sa maong surenderee ang kwarta nga balor sa iyang armas, basi sa evaluation sa Clip Committee sa Bukidnon.
Sa karon gipangita na sa militar ang pamilya ni Ka Jepy aron sila mapahibalo sa iyang pagsurender.
Giaghat usab karon sa 4th Infantry Division ang tanang sakop sa New Peoples Army sa kabukiran nga mokanaog na lamang sila ug mosurender aron nga mahatagan usab sila sa maayong panginabuhian alang sa kaugmaon sa ilang pamilya.
