Plano sa Dios Amahan nga magsakripisyo ang iyang Bugtong Anak nga si Hesu Kristo tungod ug alang sa kalibutan nga nahilayo sa iyang presensya tungod sa sala nga mibalot sa kinabuhi.
Sa karaang istorya, miagi ang “Silent Years of God’’ kon 400 ka tuig ayha natawo si Hesus sa kalibutan ug nianang panahona na istablisar na ang Roman Empire nga misakop sa Judea ug sa ubang dapit.
Matud ni Christian And Missionary Alliance Churches of the Philippines (CAMACOP) Minister Reverend Dominador Cabuenas, ang dakong gugma sa Dios ang rason nga-no gihimong pambayad sa sala ang kamatayon sa krus ni Ginoong Hesus.
Mabasa sa Balaang Kasulatan nga gisang-atan sa tinumo-tumo nga sumbong si Kristo sa sanhendrin ug hangtud gihukmang mamatay ni Pontio Pilato si Hesus.
Sigun ni Reverend Cabuenas, tungod sa sakripisyo ni Hesu-Kristo natuman ang dugay nang plano sa Dios nga lukaton ug luwason ang tanang tawo gikan sa silot kamatayon sa impiyerno.
Ang tanang motoo ug mudawat kang Kristo gihatagan na siya og kagahom nga mahimong anak ug ma-sakop sa langitnong pamilya sa Dios.
Mga kasama, pahimuslan na nato ang kahigayonan ug dili na nato huwaton nga mutiklop na ang tsansa sa paghinulsol ug makapangayo og pasaylo ug maangkon ang kinabuhi nga walay katapusan nga libreng gasa nga gihatag sa Dios alang sa Dios.
RadyoMaN Joel Viray
