Pagadian City – Gikomperma sa hepe sa kapulisan ning syudad nga ilang narekober ang sakyanan nga maoy gisakyan sa mga tulisan nga responsable sa pagtulis sa mga empleyado sa ML Lhuiller niadtong lunes sa buntag dihang dapita sa Brgy. Tiguma partikyular sa atubangan rehonal nga opisina sa Department of Education.
Sa eksklusibong interview sa RMN Pagadian kang Psupt. Alvin Saguban gisugid sa hepe nga dihang naglusad sila og follow-up operation ilang sa nakit-an ang Toyota Vios kolor grey nga dunay plaka numero AEB 7356 didto sa RT Lim, Zamboanga Sibugay nga maoy gitudlo sa mga biktima nga gihimong gateaway vehicle sa mga tulisan.
Nihimo na og makuting pagto-on ang Soco team nga maoy nisuta sa mga ebidensya nga nakuha sulod sa sakyanan.
Nasayran usab nga peke ug pinagama lang ang gitaplak nga plaka numero kay wala man kini narehistro sa Land Transportation Office.
Gisusi sa mga imbestigador ang chassis ug engine number sa maong sakyanan sa posibilidad sa pag-ila sa tag-iya niini.
Kun mahinumduman dul-an walo ka milyon nga kantidad sa mga alahas ang nadala sa mga armadong tulisan.
