Pagadian City – Tulis ang usa sa gisundang motibo karon sa kapulisan ning syudad sa pagpusil patay sa usa ka ahente sa ilimnon kagahapon sa alas 12:15 sa udto didto sa barangay Sta.Lucia, Pagadian City.
Giila ang biktima na si Jonathan Ighot Saldua, 46 anyos, minyo, sales agent sa San Miguel Beer Corporation ug residente sa Purok Santan, Ballesteros, Pagadian City.
Matud sa kapulisan sa Pagadian City Police Station, base sa CCTV footage, ang mga suspetsado nagsuot ug blue nga jacket, blue nga pantalon ug pula nga helmet samtang ang usa niini nakasuot ug puti nga jacket ug nakasakay sa kolor pula nga XRM single motor isip get-away vehicle.
Nasayrang nagdeliver ang biktima sa San Miguel Beer nga produkto sa Er-Jan Store nga nahimutang sa Purok Lawis, Santa Lucia, Pagadian City dihang kalit nga miduol ang suspetsado ug gikuha ang kita ni Saldua nga mobalor sa 80 mil pesos lakip na ang iyahang alahas nga nagkantidad ug 16 mil pesos ayha kini gipusil sa mga suspetsado.
Human ang kremin, daling misibat ang mga suspek paingon ngadto sa Barangay Dumagoc.
Nakaangkon ug duha ka samad pinusilan ang biktima sa walang bahin sa dughan ug sa suwang niini.
Nadala pa sa pinakaduol nga tambalanan ang biktima apan gideklara kini nga dead on arrival.
Padayon pa ang gihimong imbestigasyon sa kapulisan alang sa pagsuta ug pag-ila sa mga responsable sa pagpusil patay.
