TACLOBAN CITY – Waray magtuman han iya trabaho, ini an naging pahayag han Office of the Ombudsman matapos nga temporaryo nga ginsuspende han buhatan hi Talalora Samar Mayor Leonilo Costelo tungod nga waray makag-liquidate hin nagkakantidad 388, 159 pesos nga cash advances.
Ha press statement han Ombudsman, maatubang hi Costelo hin two counts ha bayolasyon han Article 218 o kun failure to render accounts han revised penal code nga may penalidad nga suspension ha serbisyo nga maabot tulo kabulan.
Nakit-an han mga imbistigador nga nakakarawat hin nagkaakntidad 18, 159 pesos nga cash advance an mao nga alkalde para han iya travel ha Pasay City pag-atender han forum dida han tuig 2014.
Nakakarawat gihapon an talalora samar hin 370, 000 pesos para han relief operations durante han bagyong Ruby.
An mao nga kantidad in nagpapabilin nga unsettled ngan unaccounted.
Sumala kan Costelo, na-delay an liquidation kay ginbiling pa an mga dokumento nga nadestroso durante han Supertyphoon Yolanda.
Sumala han Ombudsman, usa nga obligasyon han Mayor an mag-liquidate ilabi na kun nakabaik na hiya ha ira munisipyo matapos an gin-atendiran nga meeting.
