General Santos City—Samad sa bitiis ang naangkon sa usa ka Joel Villapez, 49 anyos nga taga purok Minanga, Barangay Buayan, Gensan human nga misukol sa kapulisan atol sa pagdakop kaniya, kagahapong adlawa, June 26, 2018.
Sa report sa Police Station 3 nasuta nga i-served unta sa Intel operatives sa pagpanguna ni Spo1 Miana ang warrant of arrest sa kasong frustrated murder sa suspek didto mismo sa ilang panimalay, apan dihang gipresentar ang Warrant of arrest, mikuhag sundang ang suspek dayon giataki ang mga pulis.
Tungod niini napugos ang mga nasangpit nga kini pusilon igo sa iyang bitiis. Gilayon kining gidala sa ospital aron mapailawom sa medikasyon.
Dili hinuon grabe ang samad nga naangkon niini mao nga gilayon man kining nakagawas sa ospital ug gibalhog sa silda sa Police Station 3.
Sa karon commitment order nalang ang gihuwat aron mabalhin na kini sa Gensan City Jail kung kini makapyansa ug P200,000.00 mamahimo niining maangkon ang temporaryong kagawasan.
