Davao City – Gibarugan sa relihiyosong grupo nga dakong kalapasan atubangan sa Diyos ang ‘same-sex marriage’ nga gisuportahan ni Pres. Rodrigo Duterte ‘di pa lamang dugay.
Walay makita sa balaang kasulatan nga puwede magminyo ang pareho nga gender ug mag-uban sa usa ka bubong isip magtiayon inay gikaligutgutan kini sa Dios.
Matud ni Pastor Andress Atup sa Sovereign Grace Baptist Church-Matina walay laing gihimo ang Dios mao lang ang lalake ug babaye ug kini lang usab ang gitugutan nga puwede magminyo ug wala na’y lain pa.
Gihagit ni Atup ang publiko nga batukan ang ‘same-sex marriage’ kun ugaling hingpit ipatuman sa nasud sa Pilipinas aron mapreserba ang moralidad ug dignidad isip nag-inusara nga Christian country sa tibuok Asya.
Gibarugan pa sa pastor ang iyang pagsupak sa ‘same-sex marriage’ luyo sa pamahayag ni Pope Francis nga wala kini katungod maghukom sa kalipay sa matag usa sama sa Lesbian, Gay, Bisexual ang Transgender (LGBT) community.
Nahadlok si Atup nga basin madilahig sa kaligutgot sa Dios ang atong nasud gumikan sa pagtahak sa dalan sa kasal-anan nunot sa ‘same sex marriage’ isyu.
Apan alang kang Pastor Nelson Javier sa Christological Baptist Church, nagduda siya nga kompromiso lang ang pag-pabor ni Pres. Rodrigo Duterte sa hisgutanan sa ‘same-sex marriage’ sa atong nasud.
RadyoMaN Don Pulayao
