Davao City – Nagpahimangno ang Department of Social Welfare and Development (DSWD) sa mga benepisyaryo sa Social Amelioration Program (SAP) ugaling adunay mga anomaliya atol sa pagkuha sa maong ayuda.
Sa post sa DSWD Region XI, gibutyag niini nga P50 lamang ang cash-out fee nga ibayad sa payout center.
Dili usab kinahanglan nga mukuha o mubayad og insurance, raffle o uban pang serbisyo aron madawat ang maong tabang pinansyal.
Nasayran nga gibutyag sa usa ka Jela Mie sa DXDC 621 RMN Davao Facebook page nga daghan kini’g mga silingan nga naka payout na sa SAP apan gikaltasan sila og usa ka gatos kun P100 alang sumala pa sa insurance details.
“Daghan gud ko’g silingan nga naka payout, gi kaltasan daw sila’g P100 kay sa insurance details,” sumbong ni Jela Mie.
Gipahimangno sa DSWD nga kung pabayaron ang SAP beneficiary og sobra sa P50.00, mamahimo kining itawag o isumbong sa mga DSWD hotline number o sa DSWD staff nga anaa sa Barangay aron kini maaksyonan.
Samtang, gibutyag ni Kristelle Cagatin, DSWD-XI Spokesperson nga kapin 39,000 ka mga SAP beneficiaries na ang napadal-an og schedule sa pagkuha sa maong ayuda.
RadyoMaN Kirby Manzon
