Davao City – Gi-awhag ni Davao City Mayor Sara Duterte-Carpio ang mga pribadong opisina ug establisyemento nga ipatuman ang Other Alternative Working Arrangements (OAWA) aron kalikayan nga ma-lockdown oras nga adunay mag positibo sa Coronavirus Disease 2019 (COVID-19).
Matud sa Alkalde, tungod kay taas ang kaso sa local transmission, adunay tyansa nga adunay mag positibo sa COVID-19 sa usa ka gambalay labi na kung dasok ug wala nagpatuman og limitasyon sa musulod nga trabahante matag adlaw, diin dili mapatuman ang social distancing sa maong sistema.
“Kung dili mag abot ang mga tao (empleyado), other people come in on certain days and other people come on other days, then dili masaradohan or ma-lockdown ang inyong opisina once nga dunay mag positive (sa COVID-19),” segun sa Mayor.
Subay sa Executive Order (EO) No. 70 Series of 2020, gimandoan ang tanang government offices ug establishments nga ipatuman ang OAWA hangtud sa Hunyo 30, 2021, ug gi-awhag usab ang pribadong opisina ug establisyemento nga i-implementar ang maong sistema.
RadyoMaN Kirby Manzon
