Davao City – Wala gihapon mikumpyansa ang City Government of Davao sa posible’ng surge sa kaso sa Coronavirus Disease 2019 (COVID-19) resulta sa holiday season sa milabay nga tuig.
Matud ni Davao City Mayor Sara Duterte-Carpio, gina-monitor gihapon sa lokal nga gobyerno ang possible surge sa katapusang semana sa Enero o kaha sa unang duha ka semana sa Pebrero.
“Nagpadayon gihapon ‘ta sa atong expectation nga dunay surge nga mahitabo by the last week of January or first two weeks of February tungod sa holiday season nato,” segun sa Mayor.
Gibutyag usab sa Alkalde nga ginapaningkamutan karon nga madugangan ang beds sa isolation o quarantine facilities sa dakbayan isip pagpangandam sa pagsutoy sa kaso sa unsa mang panahon.
Samtang, posibilidad usab nga ma-extend ang pagpailawom sa syudad sa General Community Quarantine (GCQ) sa Pebrero apan kini nagdepende gihapon sa pormal nga anunsyo sa Inter-Agency Task Force (IATF) kung unsa ang quarantine classification sa dakbayan sa sunod bulan.
RadyoMaN Kirby Manzon
