Davao City – Gihatagan karon og igong pagtagad ni Davao City Mayor Sara Duterte-Carpio ang mga insidente sa krimen dinhi sa syudad pinaagi sa gihimong lawom nga imbestigasyon.
Gibutyag sa Mayor nga aduna nay person of interest ang Davao City Police Office (DCPO) sa pagpatay kang Christine Corpuz, 47-anyos nga ginang nga nakit-an na lamang sa kasagbutan nga bahin sa Ladislawa Village, Brgy. Buhangin Proper Davao City niadtong Marso 1, 2021.
Matud ni Mayor Sara, padayon pang ginatigom sa otoridad ang mga ebidensya aron nga ma-anunsyo niini ang ilang suspek o posibleng responsable sa krimen.
“Kadtong kay ma’am Christine Corpuz, duna nay person of interest ang atoang Davao City Police Office. Kinahanglan nila nga itahi og tarong ang cases of evidence nga nakuha nila so that they can finally announce na duna na silay suspek,” segun sa Mayor.
Samtang, gimandoan usab ni Duterte-Carpio ang Toril PNP nga pakusgan ang ilang police visibility human sa insidenteng pagpatay sa usa ka 6-anyos nga batang lalaki nga nakit-an na lamang sa Batulosa River, Bangkas, Toril, Davao City.
“Kadtong isa ka case sa Toril (bata gipatay), ang atoang Davao City Police Office was instructed to increase their police visibility to reduce incident diha sa atong community. Double purpose pud na with the implementation of minimum public health standards,” matud sa Alkalde.
Hinuon, sa tibuok rehiyon onse, gibutyag sa Police Regional Office (PRO)-XI nga niubos og 47% ang mga natalang krimen sa Enero ug Pebero karong tuiga.
RadyoMaN Kirby Manzon
