Davao City – Giawhag ni Davao City Mayor Sara Duterte-Carpio ang mga Dabawenyo nga regular nga magpahigayon og earthquake drills sa panimalay ug sa mga trabahoan isip pagpangandam sa mga pagtay-og human nasinati sa syudad ang epekto sa 6.4 magnitude nga linog alas-11:23 sa gabii (September 6, 2020) nga mi-sentro sa Don Marcelino, Davao Occidental.
Matud sa alkalde nga angay magbaton og kahibalo ang katawhan labot sa mga angay buhaton panahon sa linog aron malikayan ang mga disgrasya hatud sa kalamidad.
“So mag drill ‘ta sa atong opisina, mag drill ‘ta sa atong balay because dili nato ma-predict unsang orasa, unsang adlawa muabot ang earthquake. Of course, i-remember nato ang mga kinahanglan nato buhaton apil na ang duck, cover and hold,” esplikar niini.
Gibutyag sa Mayor nga walay natalang ‘major damages’ sa mga imprastraktura sa dakbayan sa pagpanubay sa City Engineer’s Office alang sa mga government buildings ug Office of the Building Official (OCBO) sa mga pribadong gambalay.
RadyoMaN Kirby Manzon
