Davao City – Pipila ka adlaw una nahitabo ang pagpamomba sa Cotabato City Domingo sa gabii, aduna nay migula nga listahan sa mga lugar nga posibleng target sa pagbusikad.
Kini maoy gibutyag ni Davao City Mayor Sara Duterte-Carpio atol sa pakighinabi kaniya, gani siya nagkanayon nga bisan wala nalakip sa maong listahan ang syudad, wala kini nagkumpiyansa.
“About 5 to 7 days na ang information nga dunay mobuto nga bomba… Though wala naapil ang Davao City, we acted as if Davao is included,” saysay sa mayor.
Sumala ni Duterte-Carpio, kanunay naka red alert ang Task Force Davao (TFD) ug Davao City Police Office (DCPO) diin 24 oras naka-duty ang atong mga security personnel.
Samtang sa pakighinabi kang Public Safety and Security Command Center (PSSCC) head Angel Sumagaysay, gipaniguro niini nga plastado na ang security system sa dakbayan diin kung aduna may kinahanglan usbon, ‘minimal’ na lamang kini.
Subay niini, gi-awhag sa mayor ug ni Sumagaysay ang publiko nga kun ugaling adunay inpormasyong makalap kalabot sa hulga sa seguridad sa Davao, mamahimong makig-koordinar gilayon sa pinakaduol nga personahe sa PNP o TFD sanglit daku kini’g ikatabang alang sa kaluwasan sa tanan.
RadyoMaN Jason Amisola
