Davao City – Nakita karon ni Davao City Mayor Sara Duterte-Carpio nga posibleng dili makab-ot sa City Government of Davao ang target nga herd immunity batok Coronavirus Disease 2019 (COVID-19) sa Nobyembre karong tuiga.
Gibutyag sa alkalde (sa interbyu sa city-owned radio) nga miubos ang ihap sa nga tawo nga naga-adto sa vaccination centers bisan pa og giabrihan na ang pagbakuna alang sa general public.
Sa latest update sa vaccine cluster, anaa na sa 861,293 nga indibidwal ang nabakunahan sa first dose ug 746,259 sa second dose, layo pa sa 1.2 million Davaoeños nga target mabakunahan sa sunod bulan.
“Ma-achieve ba nato (ang herd immunity?), Opinyon ko lang ‘ni. Dili siguro siya ma-achieve ang 1.2 million within November because medyo hinay gyud. Nagalisod na sila (vaccine cluster) og pangita og mga tao nga kinahanglan nila bakunahan,” sulti sa mayor.
Ginatuki na usab karon sa vaccine cluster kung unsa pa ang mga istratehiya nga mamahimong himuon aron masolusyonan ang mga insidente diin aduna pa gihapoy nagadumili nga magpabakuna nga mga miyembro sa pipila ka komunidad tungod na usab sa impluwensya sa ilang lider.
Sa pagkakaron, gawas sa vaccination sites, ginaadtoan na usab karon sa vaccination teams ang mga barangay aron mapasabot sa mga tawo ang importansya sa bakuna ug maproteksyonan ang ilang kaugalingong sa delikado ug makatakod nga balatian.
RadyoMaN Kirby Manzon
