General Santos City— Abli ang probinsya sa Sarangani alang sa tanang miyembro sa New People’s Army kon NPA nga mubalik sa sabakan sa gobyerno.
Sumala kang Sarangani Governor Steve Solon nga kaniadto iyahang nasabtan ang ginapakigbisugan sa mga miyembro sa kalihukan, apan sa karon, ilalom sa bag-ong adminsitrasyon, makita na matud pa nga tinuod ang iyahang intensyon nga maangkon ang kalinaw.
Iyahang gi-awhag ang mga anaa pa sa kabukiran nga manaug ug tabangan ang gobyerno nga maangkon ang kalambuan sa nasud. Dugang pamahayag ni Governor Solon nga sa karon, aduna pay mga grupo nga anaa sa kalihukan sa ilahang probinsya apan hinay-hinay na matud pang naga-kawala.
Kini tungod sa ilahang ginahimo nga pagdevelop sa kabukiran sa probinsya kung asa tanan matud pa ang nakabenipisyo. Wala matud pa silay ginatan-aw, kung ordinaryong sibilyan o mga miyembro sa rebeldeng grupo gumikan alang man sa tanan ang mga programa nga ilahang ginahimo.
