SARANGANI PROVINCE– Padayon lang ang pag-atiman sa mga opisyales sa Sarangani Province sa kadagatan sa Sarangani Bay isip malungtaron nga bahandi sa probinsya.
Timaan sa seryosong pag-amping mao ang nadawat nga mga pagdayig sa bag-o ra nahuman nga Sarangani Bay Festival gikan sa mga lokal og langyaw nga turista.
Usa lamang si Mr. Michael Olrick, 63 anyos, American citizen og retired US Marines, nga naka-obserba sa kalimpyo sa palibot samtang gisaulog ang SarBay Fest 2019.
Nakita nya matud pa nga responsable ang mga SarBay citizens sa paglabay sa ilang mga basura.
Gawas sa hinlo, daghan usab aktibidad ang makita baynte-kwatro (24) oras itandi matud pa sa ilang beach didto sa California sa nasud America nga wala kaayo mga kalingawan.
Iyang giimbitahan ang iyang mga kaubanang foreigner nga adtuan ang Sarangani tungod kay wala matud pa kini gasinatig tornado, hurricane, og bisan pa ang snow ikumpara sa ilang lugar.
Bisan si Cristin Della, taga-Pagadian City, og Antonet Morillo, taga-Surigao del Sur, ang nakadayig sa kalimpyo og sa mga events nga gipasundayag. Sila mga youth leaders nga niapil sa SarBay Planet Camp gi-organisa sa Sulong Kabataan program.
Una ng gibutyag ni Governor Steve Chiongbian Solon nga sobra gatus (100+) ka mga SarBay cleaners ang gipakatag inabagan sa pagsita sa mga kapulisan, kasundaluhan og mga community volunteers masiguro lang nga bisan ang upos sa sigarilyo sa smoking area ang mabutang sa saktong basurahan.
Nalipay ang gobernador tungod kay subling napamatud-an sa Sarangani Bay Festival nga mao kini ang pinakadako apan pinakahinlo nga beach festival sa Pilipinas, sa pagsuporta nila Senador Manny og Congressman Ruel Pacquiao, Vice Governor Elmer De Peralta, mga board member, og mga mayores hilabi na ang Glan municipal og barangay officials.
Nitala og “record-breaking” ang SarBay Fest 2019 tungod kay niabot og sobra 160,000 ka mga tao ang niadto, lagpas sa nanglabay nga SarBay Festival nga anaa lang sa 150,000 kabuok.
Gisugdan kini pinaagi sa Praise and Worship Concert tungod kay makanunayon ang pagdasig nila Governor Solon kauban ang iyang asawa nga mao puy provincial og regional tourism council chairperson nga si Ms. Michelle Lopez Solon, nga gikinahanglang ihalad matag tuig sa Kahitas-an ang selebrasyon isip pagpasalamat sa ka-abundansya sa dagat.
Sa talaan sa STIPC Sarangani, niabot og P12 Milyones ka pesos ang nahimong halin sa mga concessioners kon mga gabaligya nga gikan pa sa Cebu, Davao, Lake Sebu, Gensan og mga local trader sa Sarangani, wala pay labot niini ang income sa mga beach resorts.
Nalipay pud ang transport sector hilabi na ang STARTED tungod kay puno sa mga pasahero og turista ang ilang mga sakyanan sulod sa halos lima (5) ka adlaw.
(Photo Credit to the owner)
